ALEIDA. CIDADE SEN ALMA de Víctor Boullón

Presentámosvos a primeira das nosas novidades para este verán, Aleida, cidade sen alma a primeira obra de Víctor Boullón, un título de aventuras ambientado na Compostela alto medieval e destinado ao público infantil e xuvenil, que editamos en colaboración con Komic Librería. A obra conta con prólogo de Antón Malde,  recoñecido arqueólogo galego e director do proxecto arqueolóxico do Castro das Travesas entroutros.

A obra transcorre na Compostela de finais do século XII, onde Aleida, unha inquieta rapaza cuxo pai traballa nas obras de reforma da catedral, decide investigar unha morte producida no interior do recinto, aparentemente a causa dun lobo. Nun contexto de loitas políticas entre Compostela e Braga, introducímonos nunha aventura chea de misterio. Cidade sen alma é a primeira das dúas historias desta heroína medieval creada por Víctor Boullón da que agardamos publicar a segunda entrega en 2017, aínda que ambas son historias autoconclusivas.

O vindeiro luns 25 de xullo, ás 19:30 horas, Víctor Boullón estará presente para asinar o libro na Romaría dos Libros de Verán, que se celebrará na Praza de Mazarelos de Santiago de Compostela.